Zitto amvaa Spika kuhusu posho; Asema aweza kuvuliwa uspika kwa kuvunja sheria kwa makusudi!

Naibu Katibu Mkuu wa Chama cha Demokrasia na Maendeleo (CDM) Bw. Zitto Kabwe amesema kuwa uamuzi wa Spika wa Jamhuri ya Muungano wa Tanzania Bi. Anna Makinda kuhalalisha kupanda kwa viwango vya posho za wabunge ni ukiukwaji mkubwa wa sheria na anapaswa kuwajibika kwa hilo.

Akiandika kwenye ukurasa wake wa Mtandao wa Facebook Zitto amesema kuwa posho za wabunge hazipandishwi kiholela kwani kufanya hivyo ni makosa. “Spika wa Bunge anajua kwamba posho zote hulipwa Baada ya Rais kuidhinisha. Posho anazotangaza hazijaidhinishwa kwani uthibitsho wa kuidhinisha ni Masharti Mapya ya Kazi kwa Wabunge ambayo hayajatolewa na Ofisi ya Rais. Hivyo kitendo cha kuanza kulipa posho mpya bila Masharti Mapya ya kazi za Wabunge ni kukiuka sheria ya utawala wa Bunge kifungu cha 19.”

Akifafanua maoni yake hayo Bw. Zitto amesema kuwa “Wabunge wasifanye mchezo na suala la posho. Wananchi wamekasirishwa sana na kwa kweli hatuwaelewi. Wakati Bunge la Tisa lilisifika kwa kupambana na ufisadi, Bunge la kumi litabatizwa Bunge la Posho. Ni lazima tukatae kuonekana tunajijali badala ya kujali wananchi.”

Zaidi ya hayo Zitto alienda mbali zaidi na kudai kuwa  “Spika anapaswa kuheshimu sheria ambazo Bunge limepitisha na kwenda kinyume na sheria kwa makusudi ni kosa la kuvuliwa Uspika” Zitto ambaye ni mbunge wa Kigoma Kaskazini na Naibu wa Kiongozi wa Upinzani Bungeni amesema kuwa endapo itaridhiwa kuwa posho hizo nono zitakubaliwa kulipwa kwa wabunge wa sasa itakuwaje kwa Bunge la Katiba ambalo zaidi ya nusu yake ni wabunge na wawakilishi wa CCM. “Jambo la kuzingatia kwa sasa ni kwamba, iwapo posho hizi zitalipwa kwa wabunge, nini kitazuia posho Kama hizo kulipwa kwa wabunge wa Bunge Maalumu la katiba? Huo mzigo serikali itaubeba namna gani na Hali hii ya uchumi?”

Bw. Zitto alitoa wito kwa uongozi wa Bunge kuwajibika na kukataa posho hizo kwani ni kinyume na maslahi ya wananchi na kuwa badala ya kujiongezea posho hizo tamu Bunge na serikali ijitahidi katika kuinua uchumi ili kila Mtanzania anufaike na jasho lake.

“Namsihi Spika aachane kabisa na suala hili la posho. Tukazane kukuza uchumi wa nchi ili wananchi wapate ajira, kodi iwe nyingi na tuongeze mishahara kwa wafanyakazi wote. Hoja ya ugumu wa maisha ni kwa wananchi wote sio wabunge peke yao.”

Suala la ongezeko la posho siku chache kabla ya maadhimisho ya miaka hamsini ya uhuru limewagusa vibaya wananchi wengi ambao wameona kuwa kitendo hicho cha wabunge kujiongezea posho wakati taifa liko katika hali mbaya ya kiuchumi huku tofauti ya wanufaika wa kisiasa na maskini ikizidi kuwa kubwa kila siku. Ongezeko la posho liliibuliwa na gazeti moja nchini na baadaye kupingwa na Katibu wa Bunge Dr. Kashilillah kuwa hazikuwa na ukweli wowote na kuwa zililenga kuwachonganisha wabunge na wananchi wao.

Hata hivyo, masaa machache baadaye Spika wa Bunge hilo Bi. Anna Makinda alilizungumzia suala hilo wakati akipokea taarifa ya Shirika la Umoja wa Mataifa la Maendeleo ya Watu  ambapo alikubali kuwa ni kweli ongezeko hilo limetokea kwa zaidi ya asilimia 170 toka shilingi elfu 70 kwa siku hadi shilingi 200,000 kwa siku. Spika Makinda amedai kuwa ongezeko hilo linaakisi kupanda kwa gharama za maisha huko Dodoma na hivyo fedha hizo zitawasaidia wabunge kuhudumia wananchi vizuri zaidi. Hata hivyo, hakueleza kama huko Dodoma gharama hizo zimepanda kwa wabunge tu au kwa walimu, polisi, madaktari na wananchi wa kawaida wa Dodoma vile vile ambao serikali haikuwapa ongezeko lolote la posho au mishahara.

 

Na. M. M. Mwanakijiji